Historia

Na 2015 Pastor Chesron Richardson a risibí un inspirashon pa kuminsá ku un radio online pa asina por a pone mas enfasis riba e adorashon na papiamentu i na e adoradónan ku ta guia alabansa na Kòrsou i den Antias Hulandes. El a aserká Apostelnan Raimy & Arlette Juliet, Apostelnan di iglesia House of Worship, kende a haña esaki un tremendo idea i duna aprobashon pa kuminsá e trayekto pa lanta un radio. El a buska mesora algun ekipo pa asina por kuminsá transmití via di internet, i asina House Of Worship Radio online, mihó konosí komo HOW Radio, a nase. Segun ku tempu tabata bai i e rumannan tabata fiel Dios a habri un porta pa por a hasi petishon pa un frekuensia. Dia 24 di mei di 2020 HOW Radio a ser lansá ofisialmente den aire na e frekuensia 90.9 FM.

Aktualmente tin un variedat di programa, prinsipalmente na papiamentu pero kada unu ku un otro enfoke. E ta un radio ku tin programa pa e famia kompletu. Músika ta basá riba e último kansionnan ku a sali i ta ser solisitá dor di e oyentenan. HOW Radio 90.9 FM ta un radio edukativo, spiritual, yòn, dinámiko i dushi.